Heilige eiers …
Heilige eiers, Bek-rek Burgers en ‘n Groen Ambulans!!
- Nuusbrief van 14 April 2011 -
Wanneer word Eggs Benedict “Heilige Eiers?” Wanneer jy voel jou sousie is heiliger as ‘n Hollandaise sous. Wanneer word ‘n hamburger ‘n Bek-rek burger? As jy jou burger “re-vamp” en jy voel dis uitstekend. Wanneer kry jy ‘n Groen Ambulans saam met ‘n Babbelas Brekfis? Wanneer jy dit nodig het!
Die menu uiteindelik oorgedoen en die mense eet hom van die kant af anderkant toe. Dis ‘n moeilike storie, so ‘n menu. Hoe gaan die kombuis als gemaak kry as 120 mense ‘n uur voor ‘n show by die deur instap? Jy moet almal se bestellings neem, die kos maak EN dit tafel toe dra voor die show begin. Dis ‘n storie.
Jy dink die resep uit en jy kyk wat dit gaan kos om dit te maak – al die sousies en die brou tesame. Dan maak jy prys. Lyk dit na waarde vir geld?
Mmmm ... spareribs!
Jy bedien en kyk wat die mense sê. So wat sê hulle?
Die Kaapse Beeskerrie is ‘n hit. Die skaapboud is ‘n superster – natuurlik heeltemal te goedkoop, maar dit voel so na huiskos – so what the hell?
Die brekfis is en was altyd Potters se ding. Dis lekker – plein en simpel! Ons bak nou ons eie brood. Lekker toast om jou eier op te sit. Van die Armgat tot die Babbelas brekfis toe – die hele lot. Die Babbelas het nou ‘n Groen Ambulans in plaas van vrugtesap.
My vrou het aangedring op die heilige eiers. Dit is soort van Eggs Benedict, maar met ons heilige sousie in plaas van Hollandaise. Dis baie lekker. Vra vir Nicolette.
Ons hamburgers is ge-revamp. Dis nou Bek-Rek burgers. Ek eet hulle gereeld – net omdat dit so lekker is. Veral met die nuwe pepersous..
Need I say more?
Ons “baskets” bly gewild en bly op die menu. Die Drinkebroer is die groot boetie, maar die Calamari basket bly die gewildste.
Daar’s nou vars lynvis op die menu en dis werklik baie lekker, maar dit lyk nie of JBay se mense dink lynvis is so spesiaal nie. Hulle bestel eerder Baby Kingklip met die Lemon & Chive sauce.
Die steaks is bietjie uitgebrei, maar die spareribs sit hulle ore aan. Ai, en ek het gedog die “Blue cheese, Walnut en Mushroom”-sous is so lekker.
Kom eet maar en sê jou sê. Dis menu is spesiaal so gedruk dat ek hom maklik kan verander. En dit gaan sommer gereeld gebeur.
