Nou sit jy …
-Nuusbrief van 30 Maart 2011-
Ons kuier op Nieu Bethesda by Die Waenhuis Pub & Grub. Die openingswedstryd van die sokker-wêreldbeker is pas verby en almal voel relatief tevrede. Die vleis word sommer by die voordeur gebraai en almal gebruik die kroeg se kombuis. Die bak met die tjops en wors word in die rondte gestuur en jy help jouself. Die kinders ken almal op die naam en almal ken die kinders op die naam. “Raised by the village” soos hulle sê.
Die mense groet en begin huistoe gaan. My glas is nog half. My broer s’n is leeg. “Laat ek jou nou ‘n ding leer,” sê ek vir hom. Na al my jare in die restaurantbedryf het ek goeie raad. “Nou sit jy. Dis nou wat jy wag en kyk wat gebeur.”
Ons bestel nog ‘n rondte en ek stap buitentoe om ‘n paar foto’s te neem van die mense wat uitloop. Ek bel ook sommer huistoe en gesels ‘n bietjie.
Toe dit lyk of almal uit is, stap ek weer die kroeg binne om na my broer se welsyn om te sien. Daar is drie mense oor. En hulle sit by een tafel. My broer, ‘n skrywer en ‘n fotograaf. Dis toe wat ‘n laaang interessante aand begin.
Andre Swiegers March 26, 2011
Dis hoe ek Saterdagaand gevoel het na André Swiegers se show. Hier is ‘n skrywer, digter, sanger en sy show is klaar. André staan by die laaste twee klante en gesels. Hulle glase is half. Ek sê: “Nou sit jy!” en ek maak vir ons ‘n bottel Potter’s Red oop. Dis toe wat ‘n laaang interessante aand begin.
Diep gesprekke, ligte gesprekke, kwaad word vir ander mense en lekker lag… dis halfvier die oggend toe ons loop.
Sien – dis eers as dit laataand en buitekant donker is, dat jy die mooi spots aan die binnekant begin raaksien.
Sit – en kyk wat gebeur.
Wat gaan jy in elk geval doen? Slaap? Asseblief tog!
